مورغي سفيرة الإبادة

هيدي مورغان أورتاغوس ما حدا ملحّق عليها! تركناها عند كوافير المشاهير ببيروت، لقيناها بنيويورك بمجلس الامن، (ورجعت نطّت عالناقورة بجنوب لبنان). من كم يوم كانت نجمة الموسم ببيروت، بعد الزيارة - الحدث لحلاق النجمات والنجوم، اللي عملها وقتها تسريحة غير شكل. تصوّر انو غارت منها السفيرة الاميركيّة، وصار هيي كمان بدها new look. (الجماعة كل ما دبحونا أكتر، بيصيروا نجوم المجتمع والاعلام!). المهم، غمّض عين فتّح عين، بتلاقيها للمبعوثة الأميركية وين؟ بنيويورك! رافعة ايدها بكل فخر بمجلس الأمن. (هيدا الفيتو الأميركي السادس بسنتين، لحماية آلة القتل الجهنّميّة بفلسطين!). يعطيها العافية! أيقونة الدبلوماسية الترامبية، قالت للعالم بكل بساطة: "لازم حمام الدم يستمرّ في غزة، والمدينة تختفي عن الخريطة".